Merki-Shý-Býrylbaıtal tas jolynda bolǵan jol apatynan alty adam qaza tapty, onyń ishinde eki patrýl boldy.
Áleýmettik jelilerde jol-kólik oqıǵasy týraly aqparat pen qaıǵyly oqıǵa ornynan túsirilgen kadrlar paıda boldy. Málim bolǵandaı, kólikter Merki-Shý-Býrylbaıtal tas jolynda soqtyǵysqan.
Polısııa departamentiniń baspasóz qyzmeti jol-kólik oqıǵasynyń 17 tamyz kúni saǵat 01:00 shamasynda, respýblıkalyq mańyzy bar Merki-Shý-Býrylbaıtal tas jolynyń 40-shy shaqyrymynda bolǵanyn habarlady.
- Toıota Alfard júrgizýshisi qarsy jolaqqa shyǵyp ketip, polısııanyń "Skoda Octavia" patrýldik kóligimen soqtyǵysqan. Apat saldarynan qyzmettik kólikte bolǵan jáne jol qozǵalysy qaýipsizdigin qamtamasyz etken eki patrýldik polısııa qyzmetkeri oqıǵa ornynda kóz jumdy. Qaza bolǵan polıseılerdiń biri - 11 balasy bar áke. Toyota Alphard kóliginde 8 jolaýshy bolǵan. Olardyń tórteýi oqıǵa ornynda kóz jumdy, júrgizýshi men taǵy úsh jolaýshy ártúrli aýyrlyqtaǵy jaraqattarmen ortalyq oblystyq aýrýhanaǵa jatqyzyldy, - dep habarlady polısııa departamenti.
Atalǵan fakti boıynsha Qylmystyq kodeksiniń 345-babynyń 4-bóligi "Adam ólimine ákep soqqan jol qozǵalysy erejelerin buzý" boıynsha sotqa deıingi tergeý bastaldy. Tergeý sharalary júrgizilip jatyr.
Polısııa departamenti qaza bolǵandardyń otbasylaryna kóńil aıtty.
